സ്ഥലത്ത് വെച്ച് അവർ പരിചയപ്പെട്ടിരുന്നു. കാണാൻ കൊള്ളാവുന്ന നല്ലൊരു കുട്ടിയെ കണ്ടപ്പോൾ വരുൺ വെറുതെ അങ്ങോട്ട് കയറി പരിചയപ്പെട്ടതാണെങ്കിലും അവർക്ക് കണ്ടപ്പോൾ പരസ്പരം മനസ്സിലായി. അടുത്ത ആഴ്ച പഠിക്കാൻ വരുമ്പോൾ കാണാം എന്ന് പറഞ്ഞ് വരുൺ അവിടെ നിന്നും ഇറങ്ങി.
ഒരാഴ്ച കഴിഞ്ഞു പോയി. വൈകീട്ട് കോളേജിലെ ക്ലാസ്സു കഴിഞ്ഞ വരുൺ തന്റെ പുതിയ വയലിനുമെടുത്ത് പ്രിയയുടെ വീട് ലക്ഷ്യമാക്കി നടന്നു. അവന്റെ കോളേജിന് അടുത്ത് തന്നെയായിരുന്നു പ്രിയ ശങ്കറിന്റെ വീട്. വരുൺ അവിടെ എത്തിയപ്പോൾ മറ്റു ചില കുട്ടികൾക്ക് പാട്ട് പഠിപ്പിച്ചുകൊടുക്കുകയായിരുന്ന ടീച്ചർ. അവർ വരുണിനോട് ഇരിക്കാൻ പറഞ്ഞു. വരുൺ സോഫയിൽ കയറി ഇരുന്നു. വരുൺ അവിടെ കണ്ട ഒരു ആഴ്ചപ്പതിപ്പ് എടുത്ത് മറിച്ചുനോക്കിക്കൊണ്ടിരിക്കെ പ്രിയ കോളേജ് കഴിഞ്ഞ് അങ്ങോട്ട് കയറി വന്നു.
അവർ പരസ്പരം ഹായ് പറഞ്ഞു. "എങ്ങനെയുണ്ട് ഞങ്ങടെ വീടൊക്കെ.. ഇഷ്ടായോ.." എന്നൊക്കെ ചോദിച്ച് പ്രിയ വരുണിന് കമ്പനി കൊടുത്തു. അപ്പോഴേക്ക് അവളുടെ അമ്മ അങ്ങോട്ട് വന്നു. "വരുൺ നല്ല ഗിറ്റാറിസ്റ്റോണു മോളേ" എന്ന് പറഞ്ഞ് അമ്മ വരുണിനെ
അവൾക്ക് പരിചയപ്പെടുത്തി. അവരുടെ വിശദമായ പരിചയപ്പെടലിനു ശേഷം വരുണിന് വയലിന്റെ ആദ്യ പാഠങ്ങൾ പറഞ്ഞുകൊടുക്കാനായി അമ്മ അവനേയും കൊണ്ട് പഠന റൂമിലേക്ക് പോയി. ഗിറ്റാറിൽ മിടുക്കനായിരുന്നതുകൊണ്ട് തന്നെ വരുണിനെ ബേസിക് കാര്യങ്ങളൊന്നും പഠിപ്പിക്കേണ്ടതില്ലായിരുന്നു. വരുൺ പെട്ടെന്ന് തന്നെ കാര്യങ്ങൾ പഠിക്കുന്നുണ്ടായിരുന്നു.
അങ്ങനെ ദിവസങ്ങളും ആഴ്ചകളും കടന്നുപോയി. വരുൺ ആ വീട്ടിലെ എല്ലാവരുടെയും പ്രിയപ്പെട്ട ഒരാളായി മാറിയിരുന്നു. അവിടെ കിടന്നുറങ്ങിയ ദിവസങ്ങൾവരെയുണ്ട്. പ്രിയയുടെ അച്ഛനും വരുണിനെ വല്ല്യ കാര്യമായിരുന്നു. പ്രിയയുടെ അമ്മയും അച്ഛനും വരുണിന്റെ അടുത്ത് വളരെ സ്വാതന്ത്ര്യത്തോട് കൂടി ഇടപെടുമ്പോഴും പക്ഷേ പ്രിയക്ക് അതിന് സാധിച്ചിരുന്നില്ല. അവന്റെ തിളക്കമുള്ള കണ്ണുകളിലേക്ക് നോക്കുമ്പോഴേക്കും എവിടെ നിന്നോ പ്രിയക്ക് നാണം വരും. എങ്കിലും സാധ്യമാവുമ്പോഴൊക്കെ പ്രിയ വരുണിന്റെ കൂടെ ഓരോ കാര്യങ്ങൾ മിണ്ടിയും പറഞ്ഞും നടക്കുമായിരുന്നു.
തന്റെയുള്ളിൽ അവനോട് ചെറുതായൊരു ക്രഷ് രൂപപ്പെടുന്നുണ്ടെന്ന കാര്യം പ്രിയ തിരിച്ചറിഞ്ഞിരുന്നു.
